Exo 14 | TVK | STEP |

Exodus 14

Hi Pol ni Mol-Isrel Xil Lakila Lavur Xoteh Tas te Pili e Tan xa Bue

Eksodas 14:5-31

5 Melele xa suv toto tahal Isip milongeong ni xa mol-Isrel xil laba ngamu, xi del eilep nan xil, labiles nenemien nae e labiteni labit, “?!Xir ratepol ni naha!? !Ramaen mol-Isrel xil labe reling xir, ma linapol ni ti mun polien nar xil!” 6 Misak ni, suv toto ba misemae ni moletin nan xil te vaeen tengan lisak mesen xil itel hos san xa di lalihi kat te vaeen nan. 7 Melele xa lasak xat xil bus, suv toto miloh e kat nan e bosei kat te vaeen sav xil mun del hos xil xa di lalihi xa laduxoh handred tei e he sav (600) tengan vat te vaeen xil nan liloh en. E eilep sav xil mun laba langgo kat tatei tisav nae xil e laloh langgusil xil. 8 Iahova misak ni nenemien na suv toto mei nggeih pilei sung, ma miloh usil mol-Isrel xil. E melele xa suv toto del moletin nan xil di laloh laba, mol-Isrel xil latakil ti vari, xil di lakakao del imaeen e del nenemien xa Hi tesak ni xil lateli mol-Isip xil. 9 E moletin te vaeen xil tahal Isip, laloh usil xil: ngan xil xa laloh e kat te vaeen xil, ngan xil xa di laloh e hos xil kestang, del ngan xil xa di lakakao mun. Xil laba lakamet mol-Isrel xil xa di langel e seri Tas Tepili, sangas ni taon tahal Vi-Hahirot xal Baal-Sevon.

10 Melele xa mol-Isrel xil lapus suv toto del moletin te vaeen nan xil di lamei, ulixil mikan xa mikan, ma di ladak kes Iahova ve tutouen. 11 Ma xil labiles labiteni mi Mosis labit, “?!Veneh ma oleh rerat xamem ra hal Isip!? ?Midep, von tahinen tapin ti e hal Isip iaxa oleh rerat xamem mamei e uruvuol ak tengan mei mulel en? 12 Rin ak tang iaxa matehiteni minuk e hal Isip mabit mei istal. Matehit ostokovein xamem matinga e ti mapol mi xil. !Vahos mak mu vahit mave slev inggaxor, vali ngan xa mei mulel inggak!”

13 E Mosis biteni mi xil bit, “!Ulimim nakan ti! Musoh ixeih e mupus naha xa Iahova ipol ni xosali. Mol-Isip xil xai, munapus ti mun xil. 14 Iahova kestang ivae e rin namim, e xamim munapol ni ti neta.”

15 Iahova biteni mi Mosis bit, “?Veneh ma di odak kes nou ve tutouen? Uhiteni mi mol-Isrel xil tengan lamea e lasak xat xil ve kakaoen. 16 Usa eitingil nam ihe nesao e utal xati ixorao e tas ituxoh melele xa tas ileh pas xi ihe rin lu. Imak, ma moletin xil likakao lixur xotehi e tan taxa bue. 17 Ti, inou nipol ni nenemien na mol-Isip xil ak ixeih tengan liloh lihusil xamim. Nipet rat hisok ili his suv toto e moletin te vaeen nan xil vus: ngan xa di laloh e kat nae xil, ngan xil xa di laloh e hos, e ngan xil mun xa di lakakao. 18 Melele xa nihas tan ni xil, mol-Isip xil vus likila sung xa inou nabe Iahova.”

19 Masxaxa na Hi xa di del mol-Isrel xil e kakaoen nae biles be petouxil tengan isikoe xol xil. E momah na Hi mun nggusili, 20 ba de hilaep te moletin te vaeen xil na mol-Isrel e ngan xil mun na mol-Isip xil tengan linamei ti sangas ni xil. Momah na Hi ak misa maluxoluken mi mol-Isip xil, e rin na mol-Isrel xil, di misa miehen mi xil. Misak ni, e vongien nen ak, vanut moletin te vaeen xalu ak, lasakras lalomei sangas visal xalu.

21 E vongien nen tak, Mosis misa eitingil nan be nesao e ngorao e tas, e Iahova misa votiang tei xa eilep nggo ist e mei ba bui pas tas. E melele xa mol-Isrel xil laketeh ba, lapusi xa tas mileh pas xi ngamu be rin lu, e hilaep teni, tan bue dat mak. 22 Ma e vongien nen tak, mol-Isrel xil langgur xoteh tas ak e lakakao langgo tan xa bue, e tas iaxa be vioh e serin xalu. 23 Melele xa mol-Isip xil lapus kila xa mol-Isrel xil di laba, xil laloh langgusil xil: ngan xil xa laloh e kat te vaeen xil, ngan xil xa di laloh e hos, del ngan xil xa di lakakao mun. 24 Sangas ut te valan, Hi de upang xa misomal miketeh be tan e pus moletin xil te vaeen tahal Isip e misak ni xil lada xonoxon ni xil. 25 Hi misak ni wil te kat nae xil langgon e lasakras vari laviles. Ma xil labiteni labit, “!Rave reling mol-Isrel xil xai, vengan xa Iahova di bae e rin nae!”

26 Ma Iahova biteni mi Mosis bit, “Ute momal ni hem ixorao e tas, e imei sung imavul xat mol-Isip xil ak itel hos e kat nae xil.” 27 Misak ni, melele xa eai da bemei nesao, Mosis de momal ni hem, e tas bemei mun voninen. Mol-Isip xil lasak tengan lalesae relingi, e Iahova pol ni tas mei mikilkiles ni xil e milihi xil labe huinep. 28 Tas dilomun bemei e mukutaxol moletin xil vus te vaeen tahal Isip del hos sae xil e kat nae xil mun. Reitin, ngan xil vus xa lateloh usil mol-Isrel xil e tas, tovuol e xil vameul. 29 E mol-Isrel xil, xil latehur xoteh tas e tan xa bue, e tas tehe vioh e serin xalu.

30 E melele nen ak, Iahova mileh rerat mol-Isrel xil ra he mol-Isip xil, e xil lapus tiei na ngan Isip xil ak xa latelel labe hao e seri tas. 31 Melele xa lapus xeihen xa Iahova pisen ni e melele xa bas mol-Isip xil lalel, ulixil mikan ni e lamerere kuhi ni. Laling neketen nae en del Mosis xa be moletin te polien nan.